اشهر البرامج والتطبيقات الطبية للموبايل

اشهر البرامج والتطبيقات الطبية للموبايل

للاطباء وطلبة كليات الطب

 طبعا كلنا أو أغلبنا دلوقتى معاه موبيل فيه أندرويد أو ios , فبجد بجد والله التكنولوجيا دى مينفعش فقط نستخدمها فى الواتس والـ Subway
فهحاول أجمع فى البوست ده أهم البرامج الطبية المفيدة ليك سواء فى الدراسة أو الممارسة اللى هتلاقيها على Google play أو على الـ App store , كل فيديوهات الخبرات على النت دلوقتى بتتكلم إن خلاص
مبقاش فيه حاجة إسمها إنك تبقى حافظ كل شىء , لازم تستغل التكنولوجيا دى فى التشخيص ووصف العلاج ..

1- Medscape 
كالعادة بحب أحطه الاول كل مميزات موقع الـ Medscape هتلاقيها فى الابليكيشن ده يمكن عيبه إنك هتحتاج إنترنت ع الموبيل عشان تستخدمه , ممكن تعمل Download للـ Data base بس أنا لسه مش عارف أعمل ده

2- Drug index
ده أطلس بالادوية الموجودة فى السوق المصرى بأسعرها وتركيزاتها , عيبه إنه مفيهوش كل الانواع الموجوده فى السوق , الاطلس اللى بيكون كامل وتبع النقابة غالبا بيكون ابليكيشن بفلوس

3- Diagnosaurus
إوعى بقى متعة بجد لطلبة الكلينيكال .. بتدخلو أى Symptoms بيطلعلك كل الـ Diff. diagnosis بتاعتها ,, عيبه إن مش كل الـ Items متاحة للاصدار المجانى .. تبقى الفلوس هى الكنز

4-Eponyms
نظرا طبعا للاسماء الغريبة اللى بنسمعها فى الكلية دى فالابليكيشن ده عليه كل الاسماء للأمراض والـ Syndromes المختلفة وبيديك نبذة مختصرة عنها بحيث تبقى فاهم الدنيا , لكن مش بيدى شرح بالاستفاضة لو عايز شرح ارجع للابليكيشن الاخرى زى الـ Medscape

5- Medcalc
ولإن معظمنا بيكره الرياضة فده بقى الاله الحاسبة بتاعت الدكاترة , كل المعادلات المهمة هتلاقيها عليه بتدخلو بس المعطيات وهو بيحسبلك الناتج من غير ما تشغل نفسك مين فى البسط ومين فى المقام , زى الـ BMI , Anion gap .. إلخ حتى الـ Glasgow Coma scale بتدخلو بس العيان بيفتح امتى والمعطيات بيقولك الـ Score بتاع العيان كام !

6- Cito lab Ref
ولان المعامل بقت تستهبل ومتكتبش الـ Normal range وبتحرجنا فالبرنامج فيه النورمال بتاع اى تحليل , حتى بيجيبلك إختلاف السن مثلا وكده .. برنس

7-WebMed
الابليكيشن ده بقى خطير جدا على مستقبلنا فيه خاصية إسمها Symptoms checker ,بمعنى إنه بيجيبلك جسم الانسان و انت تشاور على كل System وتقول الاعراض اللى فيه , وهو يطلعلك الـ Diff. Diagnosis للأمراض اللى بتعمل الاعراض اللى انت مدخلها , وكل ما تزود الاعراض وتخليها اكثر وضوحا كل ما التشخيص يبقى أدق ,, كلها كام سنة ويستغنو عن الدكاتره اصلا

8- Visual anatomy
لطلبة أولى وتانية بقى بغض النظر عن كل الـ 3D بتاع البرنامج , البرنامج عليه صور كتاب Gray`s anatomy ! إفتح بس الصور مع شرح الدكتور وإستمتع بجد , للاسف فيه ناس كانت بتشرح الاناتومى على ايامنا بالطباشير والسبورة كرهونا فى جسم الانسان

9- Smart Histology Lite
لطلبة أولى وتانية بردك شرايح الهيستولوجى بقى .. لكن دى مش مجرد أطلس !إنت بتختار الشريحة وتقعد تقرب براحتك وتشوف تفاصيل أدق لحد تفاصيل الخلية الواحدة ,, إفهم بقى هستولوجى وفكك من التحشيش بتاع بوز البطة وودن القطة والكلام ده

10- Prognosis
نلعب بقى دى لعبة إنك دكتور بيجيبلك عيان بيشتكى بشكوى معينة .. لو طلبت Examination بيعملهالك , لو طلبتInvestigation بيديهالك لحد ما توصل لتشخيص ..لو العيان مات Game Overطبعا
" فأما الزبد فيذهب جفاءا , وأما ما ينفع الناس فيمكث فى الأرض "

الموضوع منقول
شكرا لصاحب الموضوع الاصلى