كيف تختار تخصصك الطبى الجزء الأول

نفسك تتخصص إيه ؟؟؟؟ محتار تختار نيابتك؟

هتلاقي كتير متلخبط مش عارف يعمل إيه و ما هو التخصص الذي يناسبه و القليل اللي عارف هو عايز إيه
وخصوصا فى فترة الامتياز و طول هذه المدة و هذا السؤال يشغل بالي ما هو التخصص اللي يناسبك.....؟
في كليات الطب في مصر عشان تجاوب علي السؤال ده لازم نرجع و نشوف نظرة علي الواقع فالاختيار مش بس إيه اللي يناسبك لأن هناك :

عوامل كثيرة تتدخل في هذا الاختيار

 - ترتيبك علي الدفعة و ده طبعا مهم جدا عشان ساعتها ليك فرصة تاخد نيابة في الجامعة و علي حسب موقعك من الإعراب قصدي ترتيبك هتكون فرصتك في الاختيار أفضل فتابع معايا في الاخر هقول شوية معايير اكتسبتها بواقع اللف و الدوران وسؤال الكثير من النواب إزاي اختاروا تخصصهم
-  لو ترتيبك مش مساعدك يبقي أمرك لله استني اللي يتبقي وساعتها فكر إيه اللي يناسبك منه و طبعا أوعي تختار حاجة إنت عارف إنك من المستحيل قدراتك تقدر تغطيها .
 - لو هتتوزع طبقا لوزارة الصحة فربنا يعينك بس المهم إنك ما تفقدش الأمل و ياخدك التيار في وجهه و تصبح من عامة الشعب يعني تعرفلك كلمتين تشتغل بيهم وبعد كده محلك سر.
عشان كده لازم تحدد بالضبط التخصص اللي يناسبك و تحبه و لازم رؤيتك للمستقبل تكون واضحة و عارف إنت هتروح فين في الخطوة اللي بعد كدة
نكمل باقي العوامل اللي هتحدد اختيارك لتخصص
 - هل بتحب تتعامل مع الناس و لا لأه
•    لو لأ فممكن تختارclinical pathology  أو radiology أو تخدير
•    طب في تخصص معين بتحبه من أيام الكلية و لا أنت راجل شطووووووووووور بتحب كل حاجة في الطب. لو عاوز تخصص يلملك تخصصات كتير فعندك family medicine و إن شاء الله مستقبله هيكون كويس في السنوات القادمة
•    طب لو بتحب المرضي و التعامل معاهم يبقي أسأل نفسك السؤال التاني هل بحب التدخل السريع و أشوف نتيجة علاجي بسرعة و لا ممكن أفكر و أدي علاج و أستني نتيجته
   بمعني آخر عاوز باطنات و لا جراحات   .  
 و لا عاوز حاجة في النص يعني فيها جراحة و فيها باطنة
-  طب هل أنت شعلة نشاط و تتحمل التعب و المجهود و الضغط النفسي ممكن تاخد جراحة عامة و لا نص نص خد جراحة تخصصية و لا ما بتحبش المجهود أساسا
-  شوف الناس اللي في القسم اللي هتقضي فيه أول فترة من عمرك من نواب و غيرهم هل كويسين و هتتعلم منهم كويس و أخلاقهم عاملة إيه و هل تناسبك
-  مستقبل القسم اللي اختارته : يعني لحد فين هتتعلم منهم عشان بعد كده تكمل طموحك في مكان تاني بمعني أخر هل عندهم العلم الكافي اللي يرفع مستواك عشان تكمل بعد كده في الخارج أو تاخد زمالة أو تعمل معادلة
 - طبعا طموحك لازم يكون خارج مصرعشان تكون طبيب متميز يعني بعد كده ناوي تعمل إيه تاخد زمالة و لا تعمل معادلة و لا ناوي علي إيه بالظبط
- أكيد كتير بيفكر هل هيكسب كويس من التخصص ده و لا لأه و أنا بقولهم دي مسألة رزق فمش شرط مثلا تكون دكتور نسا و توليد عشان تشتغل كتير أوي أهم حاجة نيتك في التخصص إنه يكون إرضاء لله و إنك تبذل قصاري جهدك لتخدم الناس في هذا التخصص
- هل هذا المجال يوافق قدراتك الذهنيه يعني هل بتحبه و بتلاقي نفسك فيه و ممكن تبتكر فيه و تبدع
بس هو ده كل اللي عندي و أحب في الاخر أختم ببعض النصائح المهمة جدا

نصائح مهمة جدا
- نيتك في اختيار التخصص تكون لله و تأكد إن ربنا هيعينك و يوفقك لو دي هي نيتك
- أسأل كل من تتوسم فيهم الخير من الأطباء و النواب كيف اختاروا تخصصهم و كيف يناسبهم و كل ما تريد معرفته عن هذا التخصص
 -قضاء يوم كامل أو أكثر مع الطبيب أو النائب في القسم اللي تريده و تري كل شيء علي الطبيعة
 -أسأل علي جميع المستويات يعني من نائب القسم إلي رئيس القسم في التخصص الذي تريدة و مدي اقتناع كل منهم بصحة اختيارة لتخصصه
- لا تستمع للآخرين عندما يقولون لك أنت تنفع في كذا فأنت وحدك الذي تعرف ما يناسبك و اختر تخصصك عن قناعة تامة دون تدخل أحد
 -لا تسأل ما هو أحسن تخصص لأن كل من ستسأله سيجيبك أن تخصصه هو أفضل تخصص و لكن أفضل تخصص هو الذي يناسبك أنت
- استخير ربنا و اعلم أن الاستخارة تأتي بالخير دائما

 و الآن مع إلقاء بعض الضوء على كل من التخصصات المختلفة

النساء و التوليد

تخصص النساء والتوليد من التخصصات المتميزة فى الطب
يكفى إنك الطبيب الوحيد اللى زباينك "بيزغرطوا"
باقى الأطباء يا فى صويت، يا إما "حمد الله على السلامة"
ويكفى إنك يوميا بتشوف معجزة فصل حياة عن حياة
وبتتابع إبداع الخالق جل وعلا، من بداية تكوين الجنين، حتى ولادته
العمل فى هذا التخصص، مجزى ماديا لحد كبير
"الستات لا حيبطلوا حمل ولا خلفة"
وحتى لو حيبطلوا، حيجولك علشان تساعدهم فى إختيار وسيلة منع الحمل
العمل فى هذا التخصص يرضى طموحات الطبيب، لإتساع مجالات العمل به
فلكى تكون طبيب نساء جيد، لابد أن تكون طبيبا باطنيا جيدا وجراحا جيدا، ومتمكن فى الموجات الصوتية
هناك مجالات جديدة فى هذا التخصص، مثل جراحات المناظير و وحدات الخصوبة، حيث يتم عمل تداخلات مثل التلقيح الصناعى، والتلقيح المجهرى، وأطفال الأنابيب
هذا بالإضافة للطفرة فى الموجات الصوتية، مثل الموجات الصوتية ثلاثية الأبعاد، ورباعية الأبعاد
عيوب العمل بهذا التخصص، إنك من وإنت نايب، لغاية أستاذ شغلك مالهوش مواعيد، الصبح، بالليل، الفجر
وده طبعا مايناسبش البنات، وممكن يعمل لها مشاكل فى بيتها، ومع جوزها
لكن لو البنت إستحملت، فطبيبة النساء، الحاصلة على دكتوراة، أو ماجستير، أو حتى دبلومه مطلوبة بره، في دول الخليج، جدا جدا جدا، وبأجور مجزية جدا جدا جدا
الأطفال
    من أجمل تخصصات الطب، يكفى أنك تتعامل مع هذا الكائنات الملائكية .........  

الأطفال
    مجالات العمل به واسعة جدا، وبه العديد من التخصصات الفرعية فهناك حديثى الولادة والمبتسرين، حيث التعامل مع الأطفال بالحضانات وهناك الرعاية المركزة، وهناك التغذية، حيث تتعامل مع أمراض سوء التغذية الخاصة بالأطفال وهناك أمراض الدم والأورام، والكلى، وقلب الأطفال، وهو يشبه تخصص القلب الباطنى، فى التعامل مع الموجات الصوتية، وحتى القسطرة وللعلم، يوجد أطباء أطفال مشهورين جدا فى مجال الموجات الصوتية للقلب فى الأطفال وقسطرة القلب فى الأطفال
    من أهم مميزات العمل بتخصص الأطفال، إنك (( بعيدا عن بعض التخصصات الفرعية )) لا تحتاج لإمكانيات ضخمة بمعنى إنك ممكن تطبق أحدث التوصيات اللى بتطلع فى أى حتة فى العالم حتى لو إنت فى مستشفى قروى فى أعماق الريف
    بعيدا عن بعض التخصصات الفرعية، فهذا التخصص ملائم للبنات
    عيوب هذا التخصص:
1.    كمية ضخمة جدا من المعلومات، تقريبا محتاج تعرف الباطنة كلها بالإضافة للحاجات الخاصة بالأطفال زى التغذية
2.    كمان الأطفال الصغيرين ما بيتكلموش ، علشان تقدر تعرف شكوتهم ولا إيه اللى تاعبهم
 

الجراحة العامة
طبعا الجراحة العامة هى أم الجراحات، ومن عبائتها خرجت كل الجراحات الخاصة
طبعا العمل بها مجاله واسع جدا جدا جدا
لكن، شأنها شأن كل العلوم، والعلوم الطبية بصفة خاصة، بدأت فى التفرع لتخصصات فرعية
مثل: جراحة الأوعية الدموية، جراحة التجميل، جراحة الأطفال، الأورام، جراحة المناظير، جراحة الجهاز الهضمى، مناظير الجهاز الهضمى تاركة مجالا أضيق كثيرا لما لا يزال يسمى بالجراحة العامة
    نيابة الجراحة من أصعب النيابات، يكفى إنك بتشيل الإستقبال والحوادث وأول حد بتشوف المصابين فى الحوادث، وتقيم حالتهم، وتبعتهم للقسم المختص، أو تاخدهم عندك
    طبعا تخصص محتاج مجهود عضلي وذهني جامد جدا..........  البنات يمتنعون
وكل اللي عاوزين تخصص سهل ومريح ومكبرين دماغهم برضه يمتنعون
    نايب الجراحة في الجامعة أو فى الصحة، فى مستشفى كبير أو صغير حيشتغل كويس، وحيشوف حالات، وحيمشى إيده , يعنى لو نفسك تبقى جراح، ما تقلقش من المكان اللى حتروح فيه
    في ناس كثير بتحب جو الدم، والتعقيم، وبتحس بسعادة وهما بيخلصوا المريض من آلامه بالمشرط، "بيقطعوا عرق ويسيحوا دم" ............ دول طبعا ياخدوا جراحة
    طبعا عندك كمية معلومات ضخمة لازم تعرفها : إزاي تشوف المريض، وتشخصوا، وإيه الفحوصات اللى حتعملها، وحتشوف فيها إيه وخطوات الجراحة، والمضاعفات، تتصرف معاها إزاى؟
طب الطوارئ

طبعا التخصص دا موجود و لية مستقبل كويس بره وشغل الدكتور بيكون فى الاستقبال و الطوارئ
هوا أغلب شغله بيكون فى الـ  cardiology و الدكاترة بتوعه برده بيعملوا القساطر و الحاجات دى
بس عيبه إنك المفروض متفتحش عيادة .......... بس ممكن تفتح عيادة باطنة
و فعلا هوا مطلوب جدا فى الخارج
التخدير
التخدير تخصص ممتاز جدا جدا جدا
لكن مش سهل أبدا
لازم تعرف كل حاجة فى الباطنه ، لأنك حتشوف المريض قبل العملية
ولازم تعرف لو كان عنده حاجة فى القلب، أو الكبد، أو الكلى،...........
وتعرف حتتصرف معاه إزاى
كمان لازم تعرف كل حاجة عن كل تخصصات الجراحة،
لازم نعرف العملية اللى حتخدر المريض لها
خطواتها إيه، حتاخد وقت قد إيه، مضاعفاتها المتوقعة إيه، حتتصرف معاها إزاى حتبدأ تخفف التخدير إمتى، وحتصحى مريضك إمتى
تذكر، ما حدش بيفتكر طبيب التخدير غير لما بتحصل مصيبة
يعنى لو العملية نجحت كل المجد للجراح
ولو فشلت، كل المسئولية على التخدير   والأمثلة على ذلك كثيرة
------
ده طبعا غير شغلك فى العناية المركزة
ناس كتير ما تعرفش إن طبيب التخدير هو اللى بيشتغل فى العناية المركزة
-------
بالنسبة للفلوس، فنايب التخدير أغنى نايب،
يعنى وإنت صغير حتقدر تتنطط ومن العيادة دى للمستشفى دى، للمستوصف ده
لوزة عند بتاع الأنف والأذن، D & C عند بتاع النسا، shift فى العناية هنا أو هناك
-----
فى ميزة مهمة جدا فى التخدير، أول ما العيان يصحى، ويكح، مش بتاعك
مشاكلك ومسئوليتك كلها، والعيان متخدر
بعد ما يصحى، مش مسئوليتك، يعنى تروح تنام وتشبع نوم
ماحدش حيتصل بيك ويقول إلحق حصل كذ أو كذا للمريض
"ممكن يصحوك علشان شغل جديد....... "
الأشـــــــــــــــعة
الأشعة من التخصصات الطبية الجميلة جدا
بعيدا عن الشكل التقليدى للطبيب، الحلم بالبالطو الأبيض والسماعة
أو المشرط وغرفة العمليات، والتعقيـــــم،
تخصص مختلف، لكن لو عرفته عن قرب، حتحبه جدا
طبعا داخل فى كل التخصصات الطبية، بلا إستثناء
لازم يكون عندك فكرة، ولو محدودة، عن كل التخصصات الطبية
علشان تعرف الفحص المناسب لكل مرض، وحتعمل له فحص إيه، وتشخصه إزاى
فى المستشفى، الكل بيحتاجلك وعاوز منك خدمات،
لأنه من التخصصات الخدمية، لازم تعمل علاقات ودعاية كويسة جدا فى الوسط الطبى
لكن تعاملك مع المرضى مش كبير، يا دوبك تعمل له الأشعة، ومع السلامة
ودى ميزة كويسة جدا
زمان، كانت الأشعة على قد أشعة X ، دلوقتى العملية وسعت جدا جدا جدا
موجات صوتية على الجسم كله، أشعة مقطعية، رنين مغناطيسى،
ده طبعا غير قسطرة الشرايين الطرفية، قسطرة تشخيصية وعلاجية
الأشعة من أكتر التخصصات اللى ممكن تعمل فيها فلوس
وإنت صغير، ممكن تلف على المراكز، والمستشفيات
تشتغل فيها sonar ، أو CT أو MRI
لما تكبر ويبقى لك عيادتك، كفاية إنك تبدأ بجهاز أشعة X وجهاز sonar
وممكن تتطور حسب إمكانياتك،
طبعا أجهزة ال CT وال MRI بنتكلم فى ملايين
لكن بتجيب تمنها فى 3 - 4 سنين بالكتير
وطبعا مطلوب بره، وجوة،
الطب النفسي
تخصص مظلوم ............... نبدأها من الأول .... مجنون ... دكتور مجانين .... بتاع المجانين أهو ..... لاسع ....... كلمات حتسمعها من كل الناس حتى زمايلك الأطباء للأسف.
العيوب: وصمة العار Stigma وهذه على مستوى العالم وكتب فيها بحوث وكتب ومقالات طويلة في كل الدول حتى إن الكلية الملكية بلندن للأطباء النفسيين أطلقت حملة من عدة سنوات باسم Changing the mind علشان تحسن صورة التخصص ده أما بقية الأطباء أولا ثم عوام الناس ثانيا ....... وصمة العار هذه ستلصق بك من أهلك من جيرانك من زملائك ... لدرجة إن في كثير من الأطباء النفسيين يخجل من التصريح بتخصصه.
هذا هو العيب الوحيد ... لذا يحتاج لشخص قوي واضح الرؤية لا يتأثر بكلام الناس ... فقط
المميزات كثيرة جدا جدا جدا
1-فرص السفر أضعاف أضعاف التخصصات الأخرى من وأنت نائب وطالع .... الدول العربية ما تقدرش تجيب فيه خبير أجنبي كبقية التخصصات ببساطة لازم واحد عربي .....
2- انسى إن حد يفهم معك في حالتك من باب عيادتك لغاية لما يرجع لك المريض ثاني مرورا بالصيدلي .... يعني تخصص صح ماحدش حيعك معك في الحالة زي الضغط والسكر مثلا
3- اللي بيحب شغل اليد عندك ECT وده من العلاجات عندنا ولما تشوف نتايجه حتعرف قيمته وسيبك من الهبل بتاع التلفزيون
4-الطب النفسي مش مجانين ولا انفصال في الشخصية وعلى فكرة اسمها فصام schizophrenia وهو في العقل "الترجمة الحرفية: فصام العقل أي تفكك وظائف العقل" وليس في الشخصية أما بتاع الشخصية فاسمه DISSOCATION
5- مليء بالتخصصات الفرعية التي تدر دخلا وفيرا في العمل لو أتقنتها: الطب النفسي للأطفال والمراهقين أمراضهم كثيرة وصعبة وتحتاج خبرة مثل مرض فرط الحركة ونقص الانتباه ADHD ومرض التوحد Autism وأمراض الشخصية والسلوك ، طب علاج الإدمان ...... مصر غرقانة بالحشاشين والمدمنين للأسف ..... وعلاجهم صعب ومحتاج خبرة كبيرة في الشق النفسي والشق الدوائي، الطب النفسي للمسنين .... ألزهايمر بتاعنا إحنا بس ، الطب النفسي المتعلق بالمشاكل الجنسية بداء من الانحرافات والشذوذ ثم وصولا لمشاكل العلاقة بين الزوجين ..... والطبيب المتمرن فيها سمعته بين الناس زي الذهب لأنه حيوفر عليهم ثمن الفياجرا ..... الطب النفسي الشرعي الخاص بتقييم المجرمين ..... وهذا مجال عمله في السعودية رحب جدا جدا أكثر من مصر لأنه في مصر ينحصر في 3 أماكن فقط (العباسية والخانكة والمعمورة).
6- ممكن تعلمه بسهولة في وزارة الصحة أو في الجامعة .... ومعروف نائب وزارة الصحة بالذات العباسية والمعمورة والخانكة وقريبا مستشفى المطار أقوى بمراحل من نائب الجامعة بالذات في علاج الإدمان ويوجد قسم كبير للأطفال في العباسية ليس له مثيل في الجامعة وقسم آخر للمراهقين في حلوان ليس له مثيل في الجامعة وعلاج للإدمان في مستشفى المطار والمعمورة غير متوفر أصلا في الجامعة ..... بل في أحد مؤتمراتنا مؤخرا سمعنا من نواب بعض الجامعات أنهم ليس عندهم قسم داخلي بل عيادة خارجية فقط !!!!!