التكليف خطوه بخطوه

التكليف خطوه بخطوه , توضيحا للمفاهيم وإزاله للألتباس ~

يمكن معظم المشاكل اللى بتقابل بعضنا لما تيجى السيره الشمطاء دى , هى ان الكلام تخين وغريب على الودن , الفاظ روتينيه و حياه مكنش حد فينا يتمنى يخوضها أو بمعنى اصح .. محدش قلنا من الاول ان فينا من كده :D مش هتكلم عن طريقه التسجيل والتعامل مع الموقع , على قد مايهمنى ان ميكونش فيه لفظ انت مش عارفه أو جاهل بمميز بمميزاته وعيوبه , زى مابيقولوا " الحكم على الشئ ,فرع عن تصوره " ... ف لازم الصوره تبقى واضحه قدامك عشان تحكم صح ~
مبدأيا عشان نكون متفقين ..فى 4 قواعد هانتفق عليها من دلوقت ولحد ما

 

 تخلص نيابتك , لأن رغبات التكليف هى اول سِـلمه فى طريق البيروقراطيه الطبيه , ومش أول مره هتواجه حيره ف اختيارات صعبه ومتشابكه هاتفرق ف مسار حياتك كله بعد كده ’’
_____________________
1 .. الإستخاره ~
ماخاب من استخار , لان فى حاجات عُمرها ما هاتتحسب بالورقه والقلم , ماتعرفش خيرك فين .. أعرف واحد زميلى جاله تكليفه ف الصعيد وكان بيعيط .. بعد ما اشتغل هناك ولقى برايفت كويس بعد العياده كان دخله الشهرى بيتجاوز ال 11 الف جنيه ! وخد نيابه بعد 6 شهور كمنطقه نائيه .. ومكنش عايز يمشى منها :) ف محدش يعرف , لا الشر كله ف المكان البعيد .. ولا الخير كله ف المكان القريب ~

2 .. الشورى ~
وماندم من استشار , لازم تسال كويس قبل ماتاخد الخطوه , ناس أمينه وثقات وخاضت التجربه .. وماتكونش عباره عن ودن كبيره تتشرب بأى كلام يتقالها , وكل واحد ياخدك يمين بكلمه وشمال بكلمه .. كل واحد ليه ظروفه , وكل واحد ليه حكم ع الموقف من خلال هو فقد ايه .. محتاج حد يدينى تصور كامل بأمانه, من غير مايزن ف دماغى برأيه الشخصى

3.. الطب تنازلات وقرارت ~
مفيش حاجه فيها مميزات بيور ولا فى حاجه فيها عيوب صرف ... فانت بتقيم المُعطيات اللى قدامك فيها كام ميزه وكام عيب ؟ هاقدر أتاقلم مع العيوب ولا لأ ؟ هل ممكن اضح ى بمميزات عاجله مقابل مميزات آجله بعد كده ؟
واعرف ان أى قرار هاتاخده لازم هايكون ليه ضريبه مقابله .. إما ماديه .. اجتماعيه أو تاخير ف عمر , زواج , نيابه ...الخ
خد قرار حاسم .. هاسيب ايه مقابل ايه ؟ وهاقدر اعوض الديفيكت ده امتى وازاى ؟
ولازم يكون عندك خطه ((ب)) وخطه ((ج)) ... البدايل كلها مطروحه , عشان ماتتصدمش بعد كده :D

4.. أنت عايز ايه ~
عايز فلوس ؟ عايز تعليم ؟ عايز نيابه بدرى ؟ عايز تسافر وفى داهيه التكليف ؟
ماتقولش عايز كله :D
لان ف المرحله دى , مع الوزاره دى , والعقليات دى , فى البلد دى ... لازم هاتضحى بحاجه منهم لحد ماتوصل ..
طب عايز الحاجه دى دلوقت ولا ممكن تصبر عليها وتستحمل وهى تيجى لوحدها بس بطريق اطول وأضمن ؟
اعرف انت عايز ايه ف المرحله وانت هاتلاقى السكك معدتش كتيره ولا محيره زى مانت متخيل , بس تبقى قد قرارك :)
______________________________

ثانياً ~ معانى مصطلحات
==================
المحافظه بتتقسم (إداريا ) ل مديريات ... المديريه بتتقسم ل إدارات ... الاداره بتتقسم ل وحدات
تمام كده ؟
*المديريه = ديمو صغير لوزاره الصحه جوه المحافظه = رئيس المديريه هو وكيل وزاره = دى المكان اللى هانستلم فيه العمل وناخد قرار التعيين
*الاداره = ديمو صغير للمديريه جوه مناطق المحافظه= رئيسها اسمه مدير الاداره = ده المكان اللى هاتتوزع منه على الوحدات اللى جوه الاداره الفرعيه

يبقى ببساطه ..احنا دلوقت بنكتب ع الموقع رغبات اختيار المحافظات ( = المديريه ) وتحت كل محافظه بنختار الادارات كمان ... بعد التنسيق بيجيلك الاداره
تعمل استلام من المديريه وتروح الاداره يوزعك مدير الاداره ( بمزاجه أو حسب الاحتياج أو بالكوسه وده الاغلب ) على الوحدات , إما يوديك وحده مواصلاتها وفلوسها وتفتيشها كويس , او يبعتك الدهاليز ,, وكله بالحنيه بيفك :P
_
________________

الرغبات متقسمه على 3 مراحل اسمها أقاليم
اختيارك لرغبات حسب إقامتك أو حسب جامعتك هو اللى بيحدد الاقاليم دى
الاقليم الاول = مكان الاقامه / الجامعه + 4 محافظات مجاوره
الاقليم التانى = 2 محافظه حدودى ( حدودى مش نائى عشان محدش يتلخبط ) ودول برضه بيختلفوا من جامعه للتانى
الاقليم التالت = باقى محافظات الجمهوريه اللى باقيه ليك

الموقع ابن التنيين مش بيخليك تنقل من اقليم للتانى الا لما تستوفى كل اداراته وده التلبيس بقى , انك هاتكتب الحلو والوحش مضطرا عشان ينقلك للمرحله اللى بعدها ويكمل تسجيلك , لكن فيه ثغره هنا , انك مش مضطر تكتب الادارات مترتبه جوه المحافظه
بمعنى انا من الغربيه وجامعه المنصوره ... يبقى اقليمى الاول بقى = غربيه +دقهليه+منوفيه+كفر الشيخ+ دمياط تقريبا
انا هنا لازم اكتب كل ادارات ال 5 محافظات دول .. لكن لا يشترط الترتيب ,, يعنى ممكن اكتب ادارتين من غربيه وبعدين 3 دقهليه وبعدين 5 كفر الشيخ وبعدين ارجع تانى اكمل الغربيه وهكذا ,, بحيث ممكن اخلى الادارات الوحشه بالنسبالى ف الاخر
وبعدين اكتب ال 2 حدودى بتوع المنصوره = شمال سينا , جنوب الزفت :S
وبعدين اكمل باقى ال 249 رغبه بقى ف المحافظات زى مانت عايز

ثالثا ~

قلنا طريقه الاختيار اقليم أول هى = الاقامه أو الجامعه + 4 مجاور
اقليم تانى هى 2= حدودى ( يختلف من جامعه للتانى )
اقليم تالت =باقى المحافظات

فيه نوعين من البنى أدميينز ملهمش دعوه بالترتيبه دى ... اللى هايكتب نائى ف الاول بمزاجه + المتزوجات :(

وعلى راى المثل : يا اللى ساكته ساكته ليه , كاتبه كتابك ولا إيه ؟ :D
دول غالبا رغباتهم بتيجى زى ما بيكتبوها , أو بياخدوها عافيه باى تظلم فيه رقم قسيمه الجواز , ولا عزاء للسناجل :S

ترتيب الادارات مش شرط يكون بالقُرب والبُعد بس .. والقصه مش قصه خرايط , لازم تكون فاهم التخطيط على الاقل ف محافظتك لان فيه مدن فيها هى اقرب لمحافظات تانيه .. وفيه بلاد ف محافظات مجاوره ممكن توصلها بمواصله واحده , فى حين ان مراكز ف محافظتك تركبلها 50 مواصله !

كمان فيه معايير تانيه للحكم على الاداره غير ( القرب الجغرافى ) زى :
فلوسها ؟ بتيجى بانتظام وكامله ولا بتتسرق
تفتيشها ؟ بييجى عليها كتير وبيغلس ولا لأ
برايفتها ؟ هل مكان كويس تعرف تاكل فيه لقمه طريه ولا هتقضيها شوربه عضم
عدد دكاتره ؟ عشان ده اللى هيريحك ويقلل ايام شغلك , لو رحت مكان فيه لوحدك هاتتسوح يوميا شغل طبعا !

__________________________

رابعا : يعنى ايه جهات خارجيه ؟
====
بص يا عزيزى .. انت اتخرجت من الامتياز ( مفروض يعنى ) طبيب سوبر جيت .. يعنى جبار باطنه واطفال ونسا ونفسيه +/- عصبيه :D
بس برضه الوزاره مش مقتنعه بيك .. عشان كده تكليفنا بيكون فى القطاع ( الوقائى ) مش (العلاجى ) ! وده الفرق الشكلى والمظهرى اللى مالوش لازمه بين الوحده والمستشفى

يبقى الجهات الاساسيه = قطاع وقائى ( وحده صحيه + صحه اسره + رعايه أمومه + مستشفى تكامل + مكتب صحه )

& قطاع علاجى ( مستشفيات الوزاره العامه ) اللى موجوده ف محافظتنا كلنا .. زى مثلا مستشفى دمياط العام أو المحله العام ... الخ

***ميزه الوقائى ( اللى معظمنا هايروحه بعد التوزيع ) :~

فلوسه كويسه (قبض بتاع 1000 كده لو كامل ) + برايفت كويس لو مكان مفتوح + تزويغ سهل وعدد ايام شغل كويسه

****عيوبه ~
شغل ادارى اكتر منه طبى + تفتيش كل من هب ودب + هايطلعلك ديل وتنسى الطب وتبقى روتينى + سنه ضايعه من عمرك بدون تعليم لازم تقضيها عشان تعرف تقدم نيابه
_______________

*** ميزه العلاجى ( بيحتاج واسطه ومجموع عشان تعرف تنقله كمنتدب من الوحده ) :~

تعليم كويس ف الغالب + علاقات بدكاتره من كل التخصصات + تعملك اسم لو اشتغلت ف محافظتك بصفتك دكتور ف مستشفى العام

****عيوبه ~
مادى مش مجزى أوى ( ملكش حوافز ال 250 % ) + غالبا مش هاتعرف تشتغل برايفت + حضور كتير ونبطشيات
_______________________________________________________________________
فاكرين لما قلتلكم حدد هدفك عايز فلوس ولا تعليم ولا انتخه ؟ وهاتقدر تضحى بايه مقابل ايه ؟ :)
_______________________________________________________________________

فيه بقى قطاع تالت بره الاتنين دول
بره الصحه اصلا , جهات مستقله بتخرجلها ك ( انتداب ) تقدر تلغيه وترجع ف اى وقت .... هى دى بقى الجهات الخارجيه ! شفت ازاى :D
يبقى الجهات الخارجيه دى تكليف منتدب من المكان الاساسى ( عشان كده الموقع مش بيفتحهالك الا لما تسجل رغباتك الاساسيه )
مسموحلك فيها بحريه الاختيار لو عايز تكتبها أو لأ
جهات دى زى ( تكليف الجيش والشرطه المدنى , مصر للطيران , البترول والطاقه النوويه ومراكز الابحاث ومستشفيات التأمين ومستشفيات الطلبه ومعاهد الاورام )

**** مميزاتها ~
احيانا .. احيانا بعض الاماكن فيها تعليم كويس زى انتداب مستشفيات الطلبه والتامين والجيش والطيران
لو ليك واسطه ف مكان فيهم هاتظبطك اكيد
بعض الاماكن بتسمحلك بتسجيل بدرى زى جامعات مدن القناه
ف جميع الاحوال ارحم للناس اللى مش وش بهدله ف القرى

*** عيوبها ~
-ماديا مش مغريه ( ف الوحده فلوس اكتر ) الا لو مكان فيه صناديق خاصه وكده وهايروشوا عليك
-التعليم فيها أنت وحظك حسب المكان
-مرتبك الاساسى هاتخده من الوحده ... انما الحوافز والبدلات من الجهه الخارجيه , يعنى مشوره
- ماينفعش فيها تبديل مع حد .. ولا نقل ( حتى لو معاك واسطه ) .... أخرك تلغى انتدابك وترجع للوحده , ولو مش عايز تستلمها من الاول انت حر مفيش اجبار

معنى كده انى ممكن بعد ما خلص رغباتى الاساسيه اختار حاجات من الخارجى ولما ييجيلى الانتداب اشوف ساعتها اكمل فيها ولا ماستلمش من الاول وافضل ف وحدتى ؟ أو اروح ولو معجبنيش الحال الغى انتدابى وارجع ؟

أوك مفيش مشاكل بس خد بالك ان الخارجى مش بينزل ف التظلمات يعنى مش هتعرف تغيره , كمان الموضوع رغبات وعرض وطلب يعنى ف حاجات بتحتاج مجموع عالى , وفى حاجات محدوفه ومستشفيات تامين ف الصعيد وفى اماكن هاتشيلك نبطشيات استقبال كتير ولوود مقابل التعليم ده ... بالاضافه للعيوب اللى قلتها ~
أدرس وقرر :)

===========================
هل ممكن اتأخر ف استلام التكليف ولا لازم ف شهر 3 ؟
لا عادى براحتك قدامك تقريبا من 6 شهور لسنه
بس الفكره ان ده كله ع دماغك .. لان استلام النيابه مرتبط بمرور سنه عمل (فعلى ) ع الاقل .. لا تحسب فيها الاجازات
ف بديهى كل ما تتاخر ف استلام التكليف كل ما هتاخر نفسك ف حاجات كتير ..
يا سيدى استلم وابقى ماتروحش ... ماهو مفيش رفد ف التكليف .. كل اسبوعين كده ابقى اغطسلك يومين تلاته تكسر بيهم انقطاع العمل
الموضوع كله هايكون جزاءات ماديه مش اكتر +/- حرمانيه بقى لو انت طبيب لوحدك وسايب المكان :)

=====
كده فاضلنا كلام عن الفرق بين الوحده ومستشفى التكامل
الكلام عن التظلمات
الكلام عن التبديل لو عايز تبدل مع حد
الاجازات والاداريات
ودول بقى نسيبهم لوقتهم عشان مانلبخش الدنيا ونزهقكم :)
أظن كده الدنيا بقت احسن شويه والمفاهيم وضحت .... بوركتم ^_^

 

thanx to writer Dr Fawzy