التكليف في التأمين الصحي

أسئلة و أجوبة

حول التقديم للتأمين الصحي في التكليف

 على أساس أنه جهة من الجهات الخارجية

إيه النصيحة عموما للناس الي عايزة تكتب جهات خارجية ( زي التأمين )

اهم نصيحة بقى للناس الى هتكتب تأمين فى الجهات الخارجية
اولا يبقوا عارفين ان مفيش نقل من المكان الى هتتوزع عليه باى شكل من الوسايط حتى رئيس الهيئة ذات نفسه ميعرفش ينقلك

ثانيا محدش يكتب محافظات مفيهاش
مستشفيات
زى شمال و جنوب سيناء و الاسماعلية
و كمان فى محافظات تانية مفيهاش مستشفيات بس انا مش متأكد منها

ثالثا الى يعرف يروح تأمين السويس يروح
هياخدوا فرصة كويسة و هيسجلولهم فى الزمالة قبل دفعتهم

بس يكون عامل حسابه انه مش حيعرف يسيبه باى حال من الاحوال فى الفترة الحالية عشان هما بدأوا يطبقوا نظام التامين الصحى الشامل هناك وكانوا محتاجين الدكاترة جدا

بس بوجه عام التأمين احسن من الصحة

هل كل واحد فينا بيجيله بالاضافة لترشيح الوحدة الصحية ترشيح تانى للتأمين الصحى او اى حاجة من الجهات التانية..ولا دى لها علاقة بالعدد المقدم والمجاميع والترتيب والكلام ده ؟

لا مش كل واحد لأن عدد الاماكن فى الجهات الخارجية مبيبقاش على قد الناس كلها لكن الادارات بتنزل اعداد على قد الناس كلها

هل لو جالى ترشيح تأمين صحى ممكن استلمه على طول ولا لازم استلم الوحدة الاول وبعدين انقل للتأمين وهل النقل سهل وميسر ولا برضو نظام واسطة ؟

مبيبقاش نقل بيبقى انتــــــــــــداب و بيبقى بقرار من الوزير و كل المديريات بتفذ غصب عنها ده لو انت عايز تنفذ

 

يعني التكليف فى التأمين و الجهات الخارجية بيبقى على سبيل الانتداب من الصحة فانت بتتوزع على الصحة الاول و بعدين تستلم و تخلى فى نفس اليوم انتداب للتأمين و لو عايز تتوزع على مستشفى يبقى تستلم فى اسرع وقت عشان الاماكن بتبقى كلها متاحة قصادك

اللى تكليفه فى التأمين هل شرط يبقى نيابته فى التأمين ولا ممكن نيابته تبقى فى الصحة

لا عادى دى حاجة و دى حاجة

لأنك منتدب من الصحة

هل المرتب اقل من مرتب الصحة ؟

المرتب مش اقل ولا حاجة
الا لو اتوزعت على عيادة
انما لو اتوزعت على مستشفى بتاخد ميزتين
اولا بتشتغل نايب فى التخصص الى بتحبه من اول يوم
ثانيا فلوس النوبتجيات بتبقى كويسة و بتبقى زيك زى الصحة
كمان ممكن يبقى فى سكن و اكل فى المستشفى

انما لو هتتوزع على عيادة فمنصحش حد يستلم لأن عكس ما انا كنت فاهم النقل داخل التأمين شبه مستحيل و امضاء التخين مبيمشيش عليهم و بتفضل مكان ما اتوزعت فمن اولها كده لو مدير الفرع هيوزعك على عيادة فهمه انك مش هتستلم الا فى مستشفى يابلاش

و اهم نقطة فى صالح التأمين انها خطوة reversible يعنى ممكن ترجع المديرية فى اى وقت بس طبعا بصعوبة زي ما هنقول

الى عايز انتخة و فلوس ميروحش التأمين و يخليه فى الصحة انا فى ناس زمايلى بيقبضوا اكتر منى و بيروحوا يوم واحد بس فى الشهر

انما الى عايز يتعلم و يدعك يروح التامين صحيح هتشيل نبطشيات استقبال لما تتقرع و تشيل الطين بس هتتعلم فى التخصص الى انت بتحبه و مش هتضيع وقتك

ازاى اتثبت فى التامين بعد التكليف؟ و هو بياخد من كام فى التكليف؟

التأمين ملوش مجموع معين
الموضوع تنسيق و عرض و طلب

و بينزل له حد ادنى زي الادارات بالضبط
و التثبيت حسب توافر درجات

لأن أصلا النيابة في مستشفيات التأمين بتنزل في نيابات الصحة عادي ... يعني بتلاقي مثلا ( نيابة باطنة مستشفى المبرة بالزقازيق ) في وسط اختيارات النيابات

لو اخدت نيابة تامين فى حركة النيابات هتتثبت هناك لان درجتك المالية هتنزل على هناك و دى حاجة كويسة جدا لان مستشفيات التامين معقولة

هل كل من يتكلف في التأمين يتم توزيعه على المستشفي الرئيسي للفرع ؟، يعنى مثلا مستشفى  المبرة بالزقازيق فقط ؟ أم علي فروع التأمين بمختلف مراكز المحافظة ؟

غالبا مش كل الى جاله تأمين راح استلم
و الى اعرفه ان معظم الى راح اتوزع على المستشفى

ما هي خطوات الاستلام في التأمين

خطوات الاستلام فى التأمين

اولا بتروح الوزارة ادارة التكليف تاخد جواب الى المديرية بانتدابك للجهة الخارجية

ثانيا بتروح المديرية تستلم بورقك كامل و تاخد جواب للادارة الصحية بالاستلام و الاخلاء فى نفس اليوم

ثالثا بتروح الادارة تستلم و تخلى فى نفس اليوم

رابعا بترجع للمديرية تاخد جواب انتداب للـتأمين

خامسا بتاخد الجواب ده و تروح رئاسة هيئة التأمين فى روكسى شارع ابو المحاسن بيدوك جواب تستلم به فى الفرع الى اتوزعت عليه

سادسا بتروح بالجواب على الفرع عشان تستلم
غالبا مدير امانة الفرع و ده موظف مش دكتور هو الى بيوزعك بناء على التخصص الى انت عايزه ده لو هو محترم
انت بقى لو جدع تسأل فى الفرع على احسن مستشفى فى التخصص الى انت عايزه ده لو فيه اكتر من مستشفى

ملحوظات :
لو الفرع مفيهوش مستشفيات كبر دماغك و متستلمش الا لو معاك واسطة للوزير شخصيا او لسعيد راتب(رئيس الهيئة) ينقلك لفرع تانى
لو مدير امانة الفرع جه يوزعك على عيادة لأى سبب
حاول معاه باى حجة زى السكن او التعليم
لو موافقش عليك و على مدير الفرع برده بنفس النظام
لو موافقش متستلمش و شوفله واسطة
انما لو استلمت فى العيادة هتكره نفسك و حياتك

ايه مميزات التكليف في التأمين عن تكليف الوزارة ؟
مميزاتها انك هتشتغلى فى مستشفى فى التخصص الى بتحبيه
يعنى علاجى مش وقائى

هو الأحسن عيادة ولا مستشفى ؟

منصحش حد يستلم فى عيادات
خنقة و مفيش سكن و فلوس اقل
كمان مفيش تعليم
عشان كده لو قالولك عيادة قلهم سلاموا عليكم

ايه موضوع العيادات ده.. يعنى جوه المستشفى ولا ايه

بالنسبة للعيادات بتشتغل ممارس عام
شغل ممل و مش مجزى ماديا
منصحش اى حد يتوزع على العيادات

إيه نظام النبطشيات في التأمين

صبح و بعد الظهر و سهر و فى نبطشيات الاقسام و دى 24 ساعة
الى عليه فلوس السهر و القسم و طبعا البنات مبينزلوش سهر
بس زى ما قلت و بعيد الى بيدور على الفلوس يخليه فى الصحة
فلوسها اكتر و كمان هتسيبلك وقت كتير تشتغل برايفت

انما الى عايز يتعلم و ميضيعش وقته يروح التأمين مطمئن النفس
و كلمة اخيرة يا جماعة محدش يخاف يروح التأمين لأنك ممكن تخلى و ترجع مديريتك تانى و مفيش قانون بيمنع كده ولا حاجة العمل و البتنجان ده
و لو مرضيوش و قالك حاجة العمل هات جواب من المديرية الى هى جهة عملك الاصلية بالغاء الانتداب لحاجتها اليك ساعتها مش من حقهم يمسكوا فيك

طيب رجوع المديرية بيكون ازاي لو التأمين طلع وحش ؟

تروح للموظفة الى فى ادارة التكليف المختصة بالتأمين
و تقولها انك عايزة تلغى انتدابك للتأمين و ترجع لجهة عملك الاصلية
لو مزاجها رايق و تمام هتديلك جواب للفرع بالغاء الانتداب
انما لو ادتلك جواب بطلب الرأى
يبقى ممكن الفرع يرفض
تيجى للخطوة التانية
و هى تقديم طلب لوكيل الوزارة فى المديرية بالغاء الانتداب
و طبعا هيوافق
هتاخد الموافقة و تطلع على ادارة التكليف و هنا الفرصة هتزيد انك تاخد جواب مباشر بالغاء الانتداب
برده لو ادولك جواب يطلب ابداء الرأى يبقى رجعنا للخطوة الاولى
الحل الاخير هو تقديم طلب مباش لسعيد راتب او محسن عزام تطلب فيه الغاء انتدابك نظرا للظروف الى مش عجباك

بس عموما يا جماعة الاخلاء صعب واذا مكنش ليك وسطه مهمه مش هتعرف تخلى دخول الحمام مش زى خروجه

work load  ايه اخباره
يعنى الحضور يومى ..والنباطشيات اد ايه

انا بتكلم عن تأمين الشرقية

طبعا الموضوع بيختلف من مستشفى للتانية
بس غالبا هتشيل نبطشيات استقبال
و هتشتغل فى القسم الى انت عايزه
و ممكن يحاولوا يشيلوك شغل فى بعض الاقسام الى فيها عجز
و طبعا كله بحسابه
و لو مش عايز ارفض و صمم على رفضك
بس غالبا فى الشرقية مش هتقابل المشكلة دى

ايه المستشفيات اللي تابعة للقاهرة ؟

صيدناوي و مدينة نصر و طلبه ابو الريش...المقطم...وشبرا

ايه اخبار مستشفى المبره فى بورسعيد؟

مستشفى كويسة
لو معندكش مانع تشيل استقبال هتنبسط قوى فيها و هتشتغل الى انت عايزه
بس فى تخصصات مش فيها هتلاقيها فى التضامن

معلومات عن تأمين الشرقيه وهل فيها مستشفيات تأمين محترمه؟؟؟.

فيه مستشفى المبرة و طبعا احسن من مديرية الدقهلية بكتير و غالبا هتتعلم كويس و تستفيد من فترة التكليف بتاعتك لغاية ما تنزلك نيابات

عايز اخد تكليفى فى مستشفى تأمين ويكون فيها عضم كويس وياريت لو تكون فى اسكندرية

مستشفى جمال عبد الناصر مشهورة قوى فى العظام بس لو عايز تتوزع على مستشفى يبقى تستلم فى اسرع وقت عشان الاماكن بتبقى كلها متاحة قصادك انما الناس الى راحوا اسكندرية متأخرين اتوزعوا على عيادات و تعبوا قوى و اخلوا بصعوبة